Hər zaman sülh və təhlükəsizliyin əsas dəstəkçilərindən olan Azərbaycanın xarici siyasət fəaliyyətinin əsas istiqamətlərindən biri dünyanın digər dövlətləri ilə, xüsusilə də qonşu dövlətlərlə münasibətlərin qurulması və inkişaf etdirilməsi olub. Neytral və balanslı siyasəti ilə seçilən dövlətimiz hər zaman regionda və bütün dünyada sülh və təhlükəsizlik çağırışları edib və bunun təmin olunması istiqamətində aktivlik nümayiş etdirib. Aparılan düzgün daxili və xarici siyasət strategiyasının nəticəsidir ki, ölkəmiz dünyada ən təhlükəsiz, multikultural dəyərlərə sadiq ölkə kimi tanınmaqdadır.

Təəsüflər olsun ki, ölkəmizin mehriban qonşululq prinsipləri üzərində etdiyi çağırışlara tarixin müxtəlif dönəmlərində qonşu dövlətlər müsbət cavab verməyib, əksinə gərginliklərin yaranmasına gətirib çıxarıblar.

Xüsusilə 2020-ci ildə Azərbaycanın şanlı qələbəsi bir sıra dövlətlər tərəfindən məyusluqla qarşılanıb, sözdə təbrik etməklə əsl xəyallarının puç olduğunu ört-basdır etməyə çalışıblar. Xüsusilə qonşu İranın son illərdə ölkəmizə qarşı dolayı yolla xoşagəlməz münasibətləri, nümayiş etdirdiyi ikili standartlar tarixi əlaqələrə zərbə vurmaqdadır.

Bugün Tehranda Azərbaycan səfirliyinə edilən hücum sıradan bir hadisə deyil, birbaşa terror aktıdır. Hər zaman olduğu kimi, öz çirkin əməllərini gizlətməyə çalışan İran bu məsələdə də obyektiv davranış sərgiləməsini gözləmək mümkün deyil.

Aylardır daxili çaxnaşmalarla viran qalan bir dövlətin qonşululuqda daim yeni uğurlara doğru addımlayan və regionda sülhün təmin olunması üçün çalışan dövlətə qarşı paxıl və nümayişkəranə əməlləri heç kimə sirr deyil.

Unutmayaq ki, 30 il öncə tarixi Azərbaycan torpaqları işğal olunanda, bütün dünyada əsrin ən dəhşətli faciələrindən biri olan Xocalı soyqrımı baş verdikdə heç bir səs çıxarmayan bir dövlətdən obyektivlik və humanizm dəyərlərinə sadiqlik gözləmək də olmaz. Bunuda əlavə etməliyəm ki, bu hadisə İranda baş verən ilk belə anoloji hal deyil. İllər ərzində müxtəlif ölkələrin İranda yerləşən səfirlik və konsulluqlarına bu tipli hücumlar reallaşıb. Başqa sözlə viran bir dövlətdə terrorçuluq sıradan bir hadisəyə çevrilib. Bu qədər hallar fonunda isə ciddi bir fəaliyyət və ya təhlükəsizlik tədbirləri görülməyib. Bu həm də beynəlxalq münasibətlərdə geniş şəkildə yayılmış “Vyana Konvensiyası”nın da pozulması deməkdir.

Dövlətimiz bugün baş verənlərlə müvafiq tədbirlər həyata keçirir və qarşı tərəfdən də tələblərinin yerinə yetirilməsini tələb edəcək. Bizlər də dövlətimizin yanında olaraq birliyimizi nümayiş etdirəcəyik.

bu gün bu terror hadisəsini şiddətlə və hiddətlə qınayır, bu terroru bütün islam və müsəlman dünyasına qarşı törədilmiş vandalizm aktı kimi dəyərləndiririk.

Allahdan şəhidimizə rəhmət, yaralılarımıza şəfa diləyirik.

Rəşad Bayramov

“İctimai.az” İnformasiya portalının rəhbəri

Yeni Azərbaycan Partiyasının üzvü, YAP Nəsimi rayon təşkilatı ƏPT sədr müavini

Prezident İlham Əliyev: “Azərbaycan istehsalçı olaraq tranzit dövlətlər və istehlakçılar arasında balansı qoruyacaq”

Azərbaycan dövlətinin həyata keçirdiyi praqmatik xarici siyasət ölkəmizə beynəlxalq münasibətlər sistemində etibarlı strateji tərəfdaş imici qazandırıb. Regional təşəbbüslər Azərbaycanın möhkəmlənməsinə, bölgədəki əməkdaşlığın dərinləşməsinə xidmət edir. Milli mənafelərlə bağlı problemlərin həllinə həssas və fəal yanaşma uzaq və yaxın xaricin də diqqətindən yayınmayıb. Azərbaycan Prezidentinin yürütdüyü uğurlu xarici siyasət nəticəsində ölkəmiz 2012-ci ildə BMT Təhlükəsizlik Şurasının qeyri-daimi üzvü seçildi, dünyada beynəlxalq təşkilatlar Ermənistanı işğalçı dövlət kimi tanınıb. Azərbaycan Prezidentinin bu məsələdəki birmənalı mövqeyi təsdiqlədi ki, Qarabağın Azərbaycandan ayrılma mexanizmi yoxdur. Azərbaycanın 155 dövlətin dəstəyi ilə BMT Təhlükəsizlik Şurasına qeyri-daimi üzv seçilməsi, həmçinin 120 dövlətin təmsil olunduğu Qoşulmama Hərəkatına 2019-2023-cü illərdə sədrlik etməsi müasir Azərbaycanın beynəlxalq miqyasda nüfuzunu və qüdrətini göstərir. Prezident İlham Əliyev yanvarın 17-də Davosda Çinin CGTN (China Global Television Network) televiziya kanalına müsahibəsində bu məsələyə toxunaraq deyib ki, siyasət və həyat çox oxşardır, çünki siyasət insanlar tərəfindən yürüdülür: “Ölkəmizin Qoşulmama Hərəkatının sədri kimi səyləri yüksək qiymətləndirilib. Azərbaycan artıq dördüncü ildir ki, Qoşulmama Hərəkatına sədrlik edir. Biz yekdilliklə seçilmişik və bizim sədrliyimiz yekdilliklə daha bir il müddətinə, bu ilin sonuna kimi uzadılıb”.

Böyük güclər arasında qütbləşmənin açıq-aşkar olduğuna diqqət çəkən dövlətimizin başçısı qlobal həmrəylik üçün Qoşulmama Hərəkatının potensialını önə çəkir. “Böyük güclərin maraqları arasındakı uçurum ola bilsin ki, kiçilməyəcək. Ona görə də faktiki olaraq alternativ kimi yaradılmış, lakin sonradan müəyyən mənada potensialını itirmiş Qoşulmama Hərəkatının böyük potensialı var, çünki ölkələrin bu və ya digər dərəcədə eyni keçmişləri var, eyni problemləri var. Onların əksəriyyəti müstəmləkə olub və onlar başqalarının əsarəti altında yaşamağın nə demək olduğunu bilirlər”,-deyə cənab Prezident dünya güclərinin maraqlarını göstərir.

Bu gün Azərbaycan qlobal əhəmiyyətli təşəbbüslərlə çıxış edir. Hazırda regionda reallaşdırılan beynəlxalq layihələr Azərbaycanın iştirakı və milli maraqların nəzərə alınması ilə həyata keçirilir. Cənab Prezidentin qeyd etdiyi kimi Azərbaycanda enerji təhlükəsizliyinə gedən yolun başlanğıcında yaxşı sərmayə mühiti yaradılıb və hətta ixrac marşrutlarına malik olmadan neft-qaz sahəsinə çoxmilyardlı investisiyalar cəlb etməyə nail olunub: “Azərbaycan istehsalçı olaraq tranzit dövlətlər və istehlakçılar arasında balansı qoruyacaq. Balans olmasa, bu iş uğursuz olacaq. 2 il bundan əvvəl Bakıdan Cənubi Avropaya gedən 3500 kilometr uzunluğunda Cənub Qaz Dəhlizinin tikintisi tamamlanıb. Onun bir hissəsi dənizin altından, bir hissəsi yüksək dağlıq ərazidən keçir, bu, 7 ölkəni, 10-dan çox şirkəti, aparıcı maliyyə institutlarını – Dünya Bankını, Avropa Yenidənqurma və İnkişaf Bankını, Asiya İnfrastruktur və İnvestisiya Bankını, Avropa İnvestisiya Bankını və Asiya İnkişaf Bankını əhatə edən texniki cəhətdən çox mürəkkəb və çox bahalı layihədir”.

Azərbaycan “Sülh naminə tərəfdaşlıq” proqramı çərçivəsində NATO-nun etibarlı və fəal tərəfdaşıdır. Şərqlə Qərb arasında körpü rolunu oynayan Azərbaycan tutduğu obyektiv mövqe və çıxış etdiyi qlobal əhəmiyyətli təşəbbüslər sayəsində öz beynəlxalq statusunu dayanmadan artırır. Bakının görüş və danışıqlar ünvanı kimi müəyyən olunması bilavasitə Prezident İlham Əliyevin artan beynəlxalq nüfuzuna işarə edir. Prezident İlham Əliyev istər beynəlxalq arenada, istərsə də yerli xalq arasında bütün verdiyi sözləri yerinə yetirib. Siyasi həyatda heç vaxt olmayıb ki, Prezident İlham Əliyev söz verdiyinin arxasında dayanmasın. Verilən bütün sözlər yerinə yetirilib. Prezident İlham Əliyevin dövlət siyasəti nəticəyönlüdür. Bu, ondan irəli gəlir ki, Prezident İlham Əliyevin siyasətinin mərkəzində Azərbaycan və vətəndaşları dayanır. Buna görə də dövlətimzin başçısının xalqa söykənərək atdığı bütün addımlar öz müsbət nəcələrini verir.

Rüstəmova Aybəniz Vilayət qızı,

Avrasiya universitetinin Humanitar fənlər və regionşünaslıq kafedrasının müdiri, tarix üzrə fəlsəfə doktoru, dosent

Qara Yanvar Azərbaycan millətinin azadlığı uğrunda qəhrəmanlıq mübarizəsi kimi qeyd olunur.

Bu gün Azərbaycan xalqı 20 Yanvar faciəsini yalnız Ümumxalq Hüzn Günü kimi qeyd etmir, eyni zamanda öz azadlığına və müstəqilliynə can atan millətin mübarizliyini və məğrurluğunu özündə yaşadan qəhrəmanlıq nümunəsi kimi xatırlayır. 1990-cı il yanvarın 19-dan 20-nə keçən gecə, saat 23.30-da Bakı şəhərinə keçmiş Sovet İttifaqının qoşun hissələri tərəfindən fövqəladə vəziyyət elan edilmədən yeridilib və dinc əhaliyə divan tutulub, nəticəsində yüzlərlə insan qətlə yetirilib, yaralanıb və itkin düşüb. Sovet ordusunun xüsusi təyinatlı dəstələrinin və daxili qoşunların iri kontingentinin Bakını zəbt etməsi xüsusi qəddarlıqla müşayiət edilib. Azərbaycana göndərilən ordu hissələrinin tərkibinə Stavropoldan, Rostovdan, Krasnodardan səfərbər edilmiş erməni zabit və əsgərləri, hərbi məktəblərdə təhsil alan erməni kursantları da cəlb edilmişdi. 1990-cı il yanvarın ortalarında SSRİ Müdafiə və Daxili İşlər nazirliklərinin, habelə başqa xüsusi təyinatlı hərbi birləşmələrin 66 min nəfərdən çox əsgər və zabiti Bakı şəhərinə gətirilərək, Qala və “Nasoslu” aerodromlarında, Respublika stadionunda, Salyan qışlasında (kazarmasında) yerləşdirilmişdir. Xalqımız həmin günü unutmayıb və qəhrəmanlıq, sınaq günü kimi həmişə yaddaşlardadır.

Həmin günlər Ümummilli Lider Heydər Əliyev hər zamanki kimi siyasi iradə nümunəsi göstərib. Belə ki, 1990-cı il yanvarın 21-də Sovet rejiminin qadağalarına rəğmən, həyatını təhlükə qarşısında qoyaraq Azərbaycanın Moskvadakı Daimi Nümayəndəliyinə gələn Ulu Öndər Heydər Əliyev qanlı faciənin təşkilatçılarını dünya ictimaiyyəti qarşısında ittiham edib. Cəsarətli bəyanat verərək əliyalın xalqın qırılmasını hüquqa, demokratiyaya, humanizmə zidd, Moskvanın və respublika rəhbərlərinin günahı üzündən yol verilmiş kobud siyasi səhv kimi ifşa edib.

20 Yanvar faciəsi xaqılmız üçün gözlənilməz və çox ağrıdıcı oldu. Azərbaycanda ümumxalq hüznü olsa da, amma heç kim özün itirmədi. Qırğının səhərisi günü dərhal İctimai Dəfn Komissyiası yaradıldı və bundan  sonra şəhidlərin dəfninin təşkili işlərinə başlnalıdı. Rəsmilər buna etiraz etsə də xalq hərəkatının fəallarının təkidi ilə şəhidlərin dəfn yerinin Dağüstü parkın olması qərarlaşdırıldı. Hazırda Bakıdakı Şəhdlər Xiyabanı xaqlımızın anım yerinə çevrilib.

İnsanlığa qarşı törədilmiş bu vəhşiliklərə dünya birliyinin hələ də göz yumur. Bu qanlı hadisələrdən illər keçməsinə baxmayaraq, Azərbaycan xalqı o dəhşətli gecəni daim xatırlayır, faciəni törədənlərin ədalət qarşısına çıxacaqları günü gözləyir.

Ulu Öndər Heydər Əliyevin 20 Yanvar həqiqətlərinin ifşa olunması istiqamətində əvəzsiz xidməti olub. Ümummilli Liderin təşəbbüsü ilə Naxçıvan Muxtar Respublikasının Ali Məclisi 20 Yanvar faciəsinə ilk siyasi qiymət verən 21 noyabr 1990-cı il tarixli qərar qəbul etdi. Ulu Öndərin təşəbbüsü və göstərişləri ilə 1994-cü ilin mart ayının 29-da Milli Məclis “1990-cı il yanvarın 20-də Bakıda törədilmiş faciəli hadisələr haqqında” Qərar qəbul etdi. Ulu Öndər Heydər Əliyevin yolunu uğurla davam etdirən Prezident İlham Əliyev də şəhidlərin xatirəsinin uca tutulmasına, şəhid ailələrinin sosial məsələlərinin həll olunmasına xüsusi diqqət ayırır. Prezident İlham Əliyevin təşəbbüsləri sayəsində 20 Yanvar hadisələri ilə əlaqədar əlilliyi olan şəxslər və şəhid ailələri üçün effektiv sosial müdafiə sistemi formalaşıb. Son olaraq Prezident İlham Əliyevin 13 yanvar fəmanı ilə 20 Yanvar şəhid ailələrinin təqaüdü 600 manat olub. Bu faciə qurbanlarının uyuduğu Şəhidlər Xiyabanında təmir və yenidənqurma işləri ilə yanaşı, Bakının Yasamal rayonundakı “20 Yanvar” dairəsində, Həsən bəy Zərdabi və Müzəffər Həsənov küçələrinin kəsişməsində Qanlı Yanvar şəhidlərinin xatirəsinə memorial abidə kompleksi ucaldılıb. “Azərbaycan bu mübariz oğul və qızlarının şücaətini daim yüksək qiymətləndirir, onların ruhuna ehtiram göstərir, xatirəsini hər zaman uca tutur” deyən Prezident İlham Əliyev və birinci xanım Mehriban Əliyeva hər il yanvarın 20-də – Ümumxalq Hüzn Günündə Şəhidlər Xiyabanında 20 Yanvar şəhidlərinin xatirəsini yad edirlər. Bununla yanaşı, hər il yanvarın 20-də saat 12:00-da Azərbaycanın bütün ərazisində 20 Yanvar şəhidlərinin xatirəsi bir dəqiqəlik sükutla yad olunur, gəmilərdən, avtomobillərdən və qatarlardan səs siqnalları verilir, hüzn əlaməti olaraq dövlət bayraqları endirilir.

Sovet imperiyası milli azadlığına qovuşmaq istəyən xalqmızın səsini törətdiyi bu terrorla boğmaq istədi. Lakin Azərbaycanın vətənapərvər övladları öz al-qanları ilə şəhidlik zirvəsinə yüksələrək qəhrəmanlıq salnaməsinə parlaq səhifələr yazdılar. Buna görə də Qara Yanvar Azərbaycan millətinin azadlığı uğrunda qəhrəmanlıq mübarizəsi kimi qeyd olunur. Bu faciə zamanı həyatını itirənlərin xatirəsi böyük ehtiramla yad edilir.

Paşa-zadə Kamal Çingiz oğlu
Qara Qarayev adına Mərkəzi İncəsənət Məktəbinin violonçel ixtisası üzrə müəllimi, Azərbaycan Respublikasının Əməkdar müəllimi

Prezident İlham Əliyev: “Bərpaolunan enerji ilə bağlı proqramımız tamamilə fərqli gündəliyə malikdir”

Hazırda Azərbaycan Avropanın enerji təhlükəsizliyində zəngin neft-qaz potensialı ilə mühüm rol oynayır. Ölkəmiz Prezident İlham Əliyevin uzaqgörən siyasəti nəticəsində bu sahədə imkanlarını daha da şaxələndirir və elektrik enerjisi, əsasən, yaşıl enerjinin önəmli təchizatçısına çevrilməyi planlaşdırır. Azərbaycanın 200 qiqavata yaxın bərpaolunan enerji potensialı ölkəmizi dünyanın diqqət mərkəzinə çevirib. Prezident İlham Əliyev yanvarın 16-da Birləşmiş Ərəb Əmirliklərinin paytaxtında Əbu-Dabi Dayanıqlılıq Həftəsinin rəsmi açılış mərasimində çıxışında enerji təhlükəsizliyini iqtisadi inkişafın əsas göstəricilərindən biri olaraq qiymətləndirib: “Azərbaycanda enerji təhlükəsizliyi bir neçə il əvvəl təmin olunub. Bu gün Azərbaycan nəinki öz enerji tələbatlarını təmin edir, o cümlədən xam nefti, neft məhsullarını, təbii qazı, neft-kimya məhsullarını və elektrik enerjisini ixrac edir”.

Bu zəngin potensialdan istifadə olunmasına artıq başlanılıb. Ötən ilin yanvarında 240 MVt gücündə “Xızı-Abşeron” Külək Elektrik Stansiyasının, martda isə 230 MVt gücündə “Qaradağ” Günəş Elektrik Stansiyasının təməli qoyuldu. “Qaradağ” Günəş Elektrik Stansiyası Birləşmiş Ərəb Əmirliklərinin bu sahədə tanınmış “Masdar” şirkəti tərəfindən inşa edilir. Cənab Prezident çıxışında bu haqda da danışıb: ““Masdar” və Azərbaycan Dövlət Neft Şirkəti 4 qiqavatlıq külək və günəş enerjisi stansiyalarının yaradılmasına dair razılaşma imzaladılar. Bu qısamüddətli bir layihədir. Ortamüddətli layihələr nəticəsində güclər 10 qiqavata qədər artırılacaq. “Masdar” ilə apardığımız əməkdaşlıq Azərbaycanı yaşıl enerjinin çox mühüm ixrac mənbəyinə çevirəcəkdir”.

Azərbaycan enerji təhlükəsizliyi baxımından artıq beynəlxalq tranzit rolunu da oynayır. Son zamanlar bir çox Avropa ölkələri Azərbaycanla yaşıl enerji nəql etməklə bağlı əməkdaşlığa başlayıblar. Ölkəmiz bu istiqamətdə ixrac marşrutlarını dövlətimzin başçısı Əbu-Dabi Dayanıqlılıq Həftəsinin rəsmi açılış mərasimində ki çıxşında belə açıqlayıb: “2022-ci ilin 17 dekabr tarixində Azərbaycan, Gürcüstan, Macarıstan və Rumıniya Gürcüstanın Qara dəniz sahilindən Rumıniyanın Qara dəniz sahilinə qədər “Qara dənizin dibi ilə elektrik kabelinin çəkilməsinə dair” Saziş imzaladılar. Bu Saziş Avropa Komissiyası Prezidentinin şahidliyi ilə imzalanmışdır. Planımız Azərbaycandan 4 qiqavatlıq yaşıl enerjini nəql etmək imkanını yaradacaq kabeli çəkməkdir”.

Prezident İlham Əliyevin yürütdüyü enerji siyasətinin əsas istiqamətlərindən biri də işğaldan azad olunan ərazilərin potensialının qiymətləndirilməsi və istifadə olunmasıdır. “Bərpaolunan enerji ilə bağlı proqramımız tamamilə fərqli gündəliyə malikdir. Birincisi, bu onunla bağlıdır ki, nəhəng potensial var. İkincisi, biz onun sayəsində ixracımızı şaxələndirəcəyik” deyən Prezident dövlətimizin bu sahədə strateji hədəflərini bəyan edib. Ötən il dekabrın 17-də Buxarestdə yaşıl enerji ilə bağlı strateji tərəfdaşlıq haqqında Sazişin imzalanması da bu istiqamətdə atılan mühüm addımlardan biri oldu. Bu layihə ilə Azərbaycanın bu sahədə qarşıya qoyduğu əsas hədəf ixrac həcminin genişləndirilməsidir. Beləliklə, bərpaolunan enerji sahəsində zəngin potensiala sahib olan Azərbaycan bu istiqamətdə də reallaşdırdığı layihələrlə enerji təhlükəsizliyinin təmin olunmasında mühüm aktor kimi öz fəaliyyətini durmadan genişləndirir. Yaxın aylarda Cəbrayıl rayonunda 240 MVt gücündə “Şəfəq” Günəş Elektrik Stansiyasının istifadəyə verilməsi planlaşdırılır.

Qeyd edək ki, “Azərbaycan Respublikasının işğaldan azad edilmiş ərazilərinə Böyük Qayıdışa dair I Dövlət Proqramı”na uyğun olaraq işğaldan azad olunan ərazilərdə də “yaşıl enerji” zonası yaradılacaq. Dövlət Proqorama görə “Yaşıl enerji” zonasının yaradılması çərçivəsində elektrik enerjisi dəyər zəncirinin hər bir həlqəsində “yaşıl texnologiya”lardan və “yaşıl enerji” potensialından texniki və kommersiya əlverişliliyi nəzərə alınmaqla istifadə ediləcək.

Ağayev Nəbi Baba oğlu

K.Y.Fərəcova adına Elmi-Tədqiqat Pediatriya İnstitutunun PHŞ-nin Uşaq Bərpa Mərkəzinin Təsərrüfat bölmə müdiri

Azərbaycanla Birləşmiş Ərəb Əmirlikləri  regionda sülhün, sabitliyin və təhlükəsizliyin təmin edilməsi işində səy  göstərirlər

Prezident İlham Əliyev 2023-cü ildə xaricə ilk işgüzar səfərini yanvarın 15-də Birləşmiş Ərəb Əmirliklərinə (BƏƏ) edib. BƏƏ-nin Prezidenti Şeyx Məhəmməd bin Zayed Al Nəhyanın dəvəti ilə gerçəkləşən bu səfər ölkələrimiz arasında münasibətlərin bir çox sahədə strateji əhəmiyyətini bir daha təsdiqləyir. Əbu-Dabidə Prezident İlham Əliyevin BƏƏ-nin Prezidenti Şeyx Məhəmməd bin Zayed Al Nəhyan ilə görüşdə iki ölkə arasında siyasi, iqtisadi, təhlükəsizlik və digər sahələrdə sıx əməkdaşlıq həyata keçirdikləri bildirilib, bu əlaqələrin daha da genişləndirilməsinin vacibliyi vurğulanıb. Yanvarın 16-da BƏƏ-nin paytaxtıda Əbu-Dabi Dayanıqlılıq Həftəsinin rəsmi açılış mərasimində cənab Prezidentin iştirakı və belə bir mötəbər tədbirdə çıxşı səfərin nə dərəcədə əhəmiyyətli olduğunu göstərir. Dövlətimizin başçısı çıxşında Azərbaycan ilə BƏƏ arasında münasibətlərin strateji əhəmiyyətə malik olduğunu qeyd edib. Bu münasibətlərin istiliyi ondan irəli gəlir ki, BMT Təhlükəsizlik Şurasında Cənubi Qafqaz regionuna aid müzakirələrdə BƏƏ Azərbaycana daima dəstək göstərib. Fransa ilə Ermənistanın BMT TŞ-də Laçın-Xankəndi yolundakı aksiyaya görə Azərbaycan qarşı qəbul etdirmək istədiyi qətnaməyə BƏƏ-nin qarşı çıxması xüsusi vurğulanmalıdır. BƏƏ-nin bu dəstəyi dostluğun və qardaşlığın nümunəsi olaraq qiymətləndirilir. Çox müsbət haldır ki, hər iki dövlət regionda sülhün, sabitliyin və təhlükəsizliyin təmin edilməsi işində səy  göstərirlər.

Xatırladaq ki, 2008-ci ildən etibarən ənənəvi olaraq “Əbu-Dabi Dayanıqlılıq Həftəsi” keçirilir. Müxtəlif ölkələrdən nümayəndə heyətlərinin, sahibkarların, elm adamlarının qatıldığı Əbu-Dabi Dayanıqlılıq Həftəsi bu mövzuda dünyanın ən aparıcı tədbirlərindən hesab olunur.  Dayanıqlılıq Həftəsi bu məqsədə çatmaq üçün öz proqramını üç prinsip – qlobal əməkdaşlıq və liderlik, iqtisadi inkişaf və texnologiya, eləcə də innovasiya üzrə həyata keçirir. Budəfəki Dayanıqlılıq Həftəsində dünyanın 150 ölkəsindən 30 minədək nümayəndə iştirak edir. Azərbaycanın bu mötəbər beynəlxalq tədbirə dəvət olunması Prezident İlham Əliyevin rəhbərliyi ilə sürətlə inkişaf edərək mühüm beynəlxalq layihələrin müəllifinə və təşəbbüskarına çevrilən ölkəmizin dünya miqyasında artan nüfuzunun göstəricisidir.

Qürurverici məqamdır ki, Azərbaycan Prezidenti İlham Əliyevin Birləşmiş Ərəb Əmirliklərinə (BƏƏ) işgüzar səfəri çərçivəsində Əbu-Dabi Dayanıqlılıq Həftəsinin açılış mərasimindəki çıxışı BƏƏ mətbuatının gündəmində olub. BƏƏ-nin rəsmi WAM informasiya agentliyi, eləcə də “Əl Xalic”, “Əl-Ayn” portallarında dərc olunmuş məqalələrdə isə Prezident İlham Əliyevin çıxışından əsas məqamlar yer alıb. Qeyd olunub ki, Prezident İlham Əliyev Azərbaycanda bərpaolunan enerji mənbələrini öz enerji təhlükəsizliyinin təmin olunması üçün inkişaf etdirmədiklərini bildirib. Eyni zamanda, diqqətə çatdırılıb ki, Prezident İlham Əliyev “Masdar” və Azərbaycan Dövlət Neft Şirkətinin 4 qiqavatlıq külək və günəş enerjisi stansiyalarının yaradılmasına dair imzaladıqları razılaşmanın hələ qısamüddətli bir layihə olduğunu, ortamüddətli layihələr nəticəsində güclərin 10 qiqavata qədər artırılacağını söyləyib.

Yeri gəlmişkən, Prezident İlham Əliyevin Əbu-Dabi Dayanıqlılıq Həftəsinin rəsmi açılışında çıxışı Türkiyənin aparıcı kütləvi informasiya vasitələri tərəfindən də geniş işıqlandırılıb.

Prezident İlham Əliyevin BƏƏ səfəri iki ölkə arasında əlaqələrin bundan sonra daha da genişləndiriləcəyini göstərir. Çünki artıq dövlət başçıları tərəfindən siyasi xəttə müəyyənləşdirilib. Bu siyasi xəttə uyğun olaraq, iki ölkənin müxtəlif səviyyələrdə nümayəndə heyətlərinin qarşılıqlı səfərləri gözlənilir. Bütün bunlar da hər iki sülhsevər dövlətin əməkdaşlığının daha da güclənəcəyindən xəbər verir.

Nurullayeva Zenfira İslam qızı
Qara Qarayev adına Mərkəzi İncəsənət Məktəbinin xor ixtisası üzrə müəllimi, Azərbaycan Respublikasının Əməkdar müəllimi

“Siyasi partiyalar haqqında” yeni Qanunun qəbulu ölkəmizdə təkamül yolu ilə demokratik ənənələrin formalaşması prosesinin mühüm tərkib hissəsidir

Ölkəmizdə hazırda siyasi plüralizmin inkişafına dövlət tərəfindən lazimi dəstək göstərilir. Belə ki, qərargahı olmayan 25 siyasi partiya üçün müvafiq yerlər ayrılması, habelə vaxtı ötürülmüş qurultaylarının keçirilməsi istiqamətində tədbirlər görülüb. Ölkənin həyatında baş vermiş mühüm hadisələr ilə bağlı siyasi partiyalar tərəfindən birgə bəyanatların verilməsi və işğaldan azad olunmuş ərazilərə iqtidar-müxalifət partiyalarının birgə səfərlərinin təşkili Azərbaycanda yaşanan həmrəylik mühitinin təcəssümüdür. Vətən müharibəsi zamanı siyasi partiyaların Ali Baş Komandan İlham Əliyevə dəstək ifadə edən birgə bəyanat və müraciətlər imzalaması milli məsələlərdə ölkədə hər hansı fikir ayrılığının istisna olunduğunu göstərib. Siyasi partiyaların rəhbərləri öz birgə bəyanatında Ermənistanın işğalçı siyasətini şiddətlə qınayıblar. Birgə bəyanatların verilməsi təcrübəsi milli həmrəyliyə, habelə sağlam əməkdaşlıq ənənələrinin zənginləşməsinə xidmət edir. Bundan başqa, siyasi partiya nümayəndələrinin, politoloqlar, habelə media təmsilçilərinin iştirakı ilə 2021-ci ildə Ağdam və Şuşaya, 2022-ci ildə isə Zəngilana səfərlər təşkil olunub. Siyasi dialoqun qurulması istiqamətində əldə olunmuş uğurlar bundan sonra da bu prosesin effektiv davam etdiriləcəyindən xəbər verir. Azərbaycanda “Siyasi partiyalar haqqında” yeni Qanun layihəsinin qəbulu bu prosesi daha da sürətləndirdi. “Siyasi partiyalar haqqında” yeni Qanunun qəbulunun Azərbaycanda siyasi həmrəylik və siyasi dialoq mühitinin daha da inkişafına töhfə vermiş olacaq. Nəzərə çatdıraq ki, “Siyasi partiyalar haqqında” Qanun layihəsinin hazırlanması zamanı siyasi partiyaların, qeyri-hökumət təşkilatlarının, politoloqların və media nümayəndələrinin iştirakı ilə 2 ictimai dinləmə keçirilib. Müsbət məqamdır ki, demək olar bütün partiyara “Siyasi partiyalar haqqında” Qanun layihəsinin müzakirəsinə sivil qatılıblar. Sosial Tədqiqatlar Mərkəzi tərəfindən Qanun layihəsində əksini tapmış əsas məsələlər ilə bağlı ictimai rəy sorğusu keçirilib. Bütün təkliflərə baxılıb və Qanun layihəsində dinləmələrdən sonra müsbətə doğru 70-dək, Milli Məclisdə komitə və plenar iclaslardan sonra müsbətə doğru 40-dək əlavə və dəyişiklik edilib. 6 fəsil, 30 maddədən ibarət Qanun layihəsində Venesiya Komissiyasının sırf siyasi partiyanın statusuna və fəaliyyətinə aid olan 132 tövsiyəsindən 112-si nəzərə alınıb.

Azərbaycan dövlətinin əsas məqsədi ölkədə siyasi dialoqun canlanması və çoxpartiyalılıq üçün əsasların mükəmməlləşdirilməsidir. Qanun layihəsi çoxpartiyalı sistemin yaradılmasına xidmət edəcək. Qəbul edilən yeni qanun dövlətlə siyasi partiyalar arasında səmərəli əməkdaşlığa geniş imkan yaradacaq.

“Siyasi partiyalar haqqında” yeni Qanuna görə hər kəs bərabər şəkildə siyasi partiya yaratmaq və ya mövcud siyasi partiyaya daxil olmaq hüququna malikdir. Bu hüquq yalnız qanunla müəyyən edilmiş hallarda məhdudlaşdırıla bilər. Qoyulan məhdudiyyətlər həmin hüququn mahiyyətini dəyişməməlidir, qanuni məqsədə yönəlməli və həmin məqsədə mütənasib olmalıdır. Dövlət siyasi partiyaların təsis edilməsi və fəaliyyətlərinin həyata keçirilməsi üçün, hüquqlarına və qanuni mənafelərinə əməl olunmasına bərabər hüquqi şərait yaradılmasına təminat verir. Bununla yanaşı, siyasi partiyaların respublikanın ictimai-siyasi həyatında daha yaxından iştirakının təmin edilir. Yeni qanun layihəsinin qəbulu ölkəmizdə təkamül yolu ilə demokratik ənənələrin formalaşması prosesinin mühüm tərkib hissəsidir. Bütün bunlar bilavasitə Azərbaycanda yaşanan demokratik münasibətlərin təzahürüdür. Yeni qanun  partiyaların cəmiyyət həyatında iştirakçılığının artmasında mühüm rol oynayacaq.

Qasımov Səyavuş Kamran oğlu,

Avrasiya Universitetinin Beynəlxalq əlaqələr üzrə prorektoru, siyasi elmlər üzrə fəlsəfə doktoru, dosent